പെരുവണ്ണാമൂഴിയിലെ മുതലകളും കുറ്റ്യാടി അണക്കെട്ടും

കോഴിക്കോട് ജില്ലയിൽ നഗരത്തിൽ നിന്ന് അറുപതു കിലോ‍മീറ്റർ അകലായയി സ്ഥിതി ചെയ്യുന്ന അണക്കെട്ടാൺ പെരുവണ്ണാമൂഴി, കുറ്റ്യാടീ അണക്കെട്ടെന്നും അറിയപ്പെടുന്നു

കടലുണ്ടി പക്ഷിസങ്കേതം

കോഴിക്കോട് നഗരത്തിൽ നിന്ന് 19 കിലോമീറ്റർ ദൂരെ കടലുണ്ടിപ്പുഴയുടെ സംഗമസ്ഥാനത്ത് സ്ഥിതിചെയ്യുന്ന മനോഹരമായ സ്ഥലമാണ് കടലുണ്ടി. കണ്ടൽക്കാടുകൾ കൊണ്ട് സമൃദ്ധമായ ഇവിടം ഏകദേശം നൂറോളം ഇനം പക്ഷികളുടെ വാസസ്ഥലവും അറുപതോളം ദേശാ‍ടനപ്പക്ഷികളുടെ താവളവുമാണ്. ഒക്റ്റോബർ മുതൽ ഏപ്രിൽ വരെയുള്ള കാലമണ് ഇവിടം സന്ദർശ്ശിക്കാൻ ഏറ്റവും അനുയോജ്യം.

ജനുവരി 26ന്റെ അവധിദിവസമായിരുന്നു ഞാൻ ഇവിടം സന്ദർശ്ശിച്ചത്, ഇപ്രാവശ്യവും മുൻ‌കൂട്ടി പ്ലാൻ ഒന്നും ചെയ്യാത്ത ഒരു യാത്ര. ഞാനും പ്രശാന്തും ഏകദേശം ഒരു മണിയായപ്പോ‍ഴാണ് എങ്ങോട്ടു പോകണം എന്ന ചിന്തക്കറുതിയാക്കിക്കൊണ്ട് കടലുണ്ടി എന്ന് തീരുമാനിക്കുന്നത്. മഞ്ചേരിയിൽ നിന്ന് മോങ്ങം കൊണ്ടോട്ടി വഴി ഫറോക്കിൽ എത്തി. അവിടെ നിന്ന് കടലുണ്ടിയിലേക്ക് ഏകദേശം റെയില്പാതയോട് സമാന്തരമായ വഴി. ഏകദേശം ഒരു വർഷമുൻപ് ഒരു രാത്രിയിലെ, നക്തഞ്ചരത്തിനിടക്ക് ഞാനും എന്റെ സുഹൃത്ത് അനൂപും കൂടി കടലുണ്ടിയിലെ അഴിമുഖത്തു പോയിരുന്നിരുന്നു. പക്ഷെ നിലാവ് പോലും ഇല്ലായിരുന്ന അന്ന് അവിടെ ഇരുന്ന് നക്ഷത്രങ്ങളെയും നോക്കി തിരിച്ചു പോന്നു.

കടലുണ്ടി റെയിൽ‌വേ നിലയത്തിനടുത്തു കൂടിയുള്ള വഴിയിലൂടെ ഏകദേശം 200 മീറ്റർ പോയാൽ ജട്ടിയിലെത്തും. അവിടെ അന്വേഷിച്ചപ്പോൾ മണൽ‌വാരൽ തൊഴിലാളിയായ നാരയണേട്ടനോട് പറഞ്ഞാൽ തോണിയിറക്കും എന്നറിഞ്ഞു. കത്തുന്ന വെയിലുണ്ടായിരുന്നെങ്കിലും വിശാലമായ അഴിമുഖത്ത് വെള്ളത്തിന് നടുവിലുള്ള മണൽത്തിട്ടയിലിരിക്കുന്ന ടേണുകളെ കണ്ടപ്പോൾ എല്ലാം മറന്നു.

നാരായണേട്ടൻ തോണിയെടുത്തു ഞങ്ങൾ അതിൽ കയറി, അധികം വലുതല്ലാത്ത തോണീ, അനങ്ങുമ്പോൾ ആടുന്നുണ്ട്.. ചെറിയഭയം ഉണ്ടോ എന്ന് ചോദിച്ചാൽ... ഇല്ല :)

നാരയണേട്ടൻ തോണീ പതുക്കെ തുഴഞ്ഞ് മണൽതിട്ടയുടെ കുറച്ചൊക്കെയടുത്ത് കൊണ്ടുവന്നു. അധികം അടുത്തുപോയാൽ അവ പറന്നു പോകും.

മണൽതിട്ടയിൽ ധാരളം ടേണുകൾ ഉണ്ടായിരുന്നു, ക്വാക് ക്വാക് എന്നു കരഞ്ഞുകൊണ്ട്.

ഇവയെക്കൂടാതെ പലതരം കൊക്കുകളും മണലൂതി കൃഷ്ണപ്പരുന്ത് ചെമ്പരുന്ത് മുതലായ പക്ഷികളെയും അവിടെ കാണാൻ സാധിച്ചു.

ഏകദേശം മൂന്നുമണിക്കൂറോളം തോണിയിൽ അഴിമുഖത്തെ കണ്ടൽക്കാടുകളുടെ ഇടയിലൂടെ സഞ്ചരിച്ച ശേഷം ഞങ്ങൾ കരക്കിറങ്ങി, നാരായണേട്ടനോട് സലാം പറഞ്ഞ് പുതിയ പാലത്തിലൂടെ സ്ഥലം കാലിയാക്കി.

കൂടുതൽ വിവരങ്ങൾക്ക് അവിടത്തെ വഴികാട്ടിയും തോണിക്കാരനുമായ നാരയണേട്ടനുമായി ബന്ധപ്പെടാവുന്നതാണ് മൊബൈൽ - +91-984714125

അരിമ്പ്ര മല

അരിമ്പ്ര മല, മലപ്പുറം ജില്ലയുടെ പടിഞ്ഞാറ് വശത്തായി നീണ്ട് നിവര്‍ന്നു കിടക്കുന്ന മലമ്പ്രദേശം, ഒരു വശത്ത് കോഴിക്കോട് വിമാനത്താ‍വളമുള്‍പ്പെടുന്ന മലകള്‍, മലയുടെ കിഴക്കെ ചെരുവില്‍ എന്‍ എച്ച് 219 ന്റെ ഭാഗമായീ മോങ്ങവും മൊറയൂരും, പടിഞ്ഞാറ് എന്‍ എച്ച് 17 ഉം വേങ്ങരയും. ഈ മലയ്ക്ക് ഊരകം മല എന്നും പേരുണ്ട്. മലപ്പുറം ജില്ലയെ നെടുകെ മുറിച്ചുകൊണ്ട് കിടക്കുന്ന ഈ മലകാരണം അടുത്താകേണ്ടിയിരുന്ന പല സ്ഥലങ്ങളും അകലെയാണ്. സ്കൂളില്‍ പഠിക്കുന്ന കാലം മുതല്‍ നീലനിറത്തില്‍ കണ്ട ഈ മലയുടെ നെറുകയില്‍ കയറുക എന്നതൊരു ആഗ്രഹമായിരുന്നു. അങ്ങു ദൂ‍രെ ആ‍ല്പ്സീന്റെ സൈഡിലൂടെയൊക്കെ നടന്നിട്ടും ഇക്കാര്യം നടന്നില്ല.


ഞായറാഴ്ച ഹര്‍ത്താല്‍ ദിവസം, ഇപ്രാവശ്യത്തെ ഒഴിവിനു വന്നപ്പോള്‍ തന്നെ അക്കാര്യം നടത്താന്‍ തന്നെ തീരുമാനിച്ചു. രണ്ടു ബൈക്കൂകളിലായി ഞാനും എന്റെ സുഹൃത്തക്കളാ‍യ പ്രശാന്തൂം അറിയപ്പെടുന്ന കവിയായ ശൈലനും കൂടി യാത്രതിരിച്ചു. വിനോദസഞ്ചാരവികസനത്തിന്റെയോ മറ്റോ ഭാ‍ഗമായി മുകളില്‍ വരെ റോഡും ഉണ്ടാക്കീയിട്ടുണ്ട്. മുസ്ലിയരങ്ങാടിയില്‍ നിന്ന് തുടങ്ങിയ റോഡ് മലയടിവാരത്തില്‍ വെച്ച് ചെമ്മണ്‍പാതയായി. ചുറ്റിവളഞ്ഞ് ചുരം കയറുന്ന് പോലെ മുകളിലേക്ക് കയറുന്ന ഈ വഴിയിലൂടെ ഞങ്ങളുടെ ബൈക്കുകള്‍ കുതിച്ചും കിതച്ചും വലിഞ്ഞു കയറി. അതിമനോഹരമായിരുന്നു ആ യാത്ര. കുറേ നേരം കയറിയപ്പൊള്‍ മലയുടെ നെറുകയില്‍ എത്തി.



അവിടെ നിന്ന് പല റോഡുകള്‍ പോകുന്നുണ്ടായിരുന്നു. ഒന്ന് ഒരു കരിങ്കല്‍ ക്വറിയ്യുടെ അടുത്തേക്കും മറ്റൊന്ന് മലമുകളിലെ അമ്പലത്തിലേക്കും. അമ്പലത്തിന്റെ അവിടെ വരെ കയറാന്‍ സമയം ഞങ്ങളെ അനുവദിച്ചില്ല. അമ്പലത്തിന്റെ ഫോട്ടോയും മറ്റു വിവരണങ്ങളും അടുത്തയാത്രയില്‍.

മലയുടെ മുകളിലൂടെയുള്ള വഴിയിലൂടെ ഞങ്ങള്‍ യാത്ര തുടര്‍ന്നു ദൂരെ വിമാനത്താവളത്തില്‍ വിമാനങ്ങള്‍ ഇറങ്ങുന്നത് ഇവിടെ നിന്ന് കാണാമായിരുന്നു. താഴെ മോങ്ങം ഉള്‍പ്പെടുന്ന സ്ഥലത്തിന്റെയൂം മറ്റനവധി കുന്നുകളുടെയും മനോഹരമായ കാഴ്ച. ചിലഭാഗങ്ങളില്‍ റബ്ബര്‍ മരങ്ങളുടെ ആക്രമണം. പാറകള്‍ മുഴുവന്‍ അടര്‍ത്തിയെടുത്ത് മലപ്പുറത്തെ രമ്യഹര്‍മ്മങ്ങളായി മാറുന്നുമുണ്ട്. ഇവിടുത്തെ കാഴ്ചകളും പച്ചപ്പുമൊന്നും അധികനാള്‍ കാണുമെന്നു തോന്നുന്നില്ല. മലമാത്രം കാണും അത് മുഴുവനായി തുരന്നു കൊണ്ടു പോകാന്‍ മാത്രം സങ്കേതികവിദ്യയൊന്നും തല്‍ക്കാലം ഇവിടെ ഇല്ലാത്തകൊണ്ട് പക്ഷേ പാറകള്‍ മുഴുവന്‍ തുരന്ന് വികൃതമാക്കപ്പെട്ട മുഖവുമായി. പക്ഷെ ഒരു സത്യം പറഞ്ഞാല്‍ കേരളത്തിന്റെ മറ്റേതെങ്കിലും ഭാഗത്തായിരുന്നെങ്കില്‍ പണ്ടേ ഇവിടെം നശിച്ചേനെ.



സൂര്യനസ്തമിക്കുന്ന സമയം വരെ അവിടെ ചിലവഴിച്ചു. കാര്‍മേഘം മൂടിയിട്ടുണ്ട് മഴ ഏതു സമയവും താഴേക്ക് വീഴാമെന്ന അവസ്ഥ, വീണ്ടും ഉടനെ കാണാം എന്ന് മനസ്സില്‍ പറഞ്ഞുകൊണ്ടവിടെനിന്ന് ഇറങ്ങി. ഈ മലമുകളില്‍ നിന്ന് റോഡുകള്‍, വേങ്ങര മോങ്ങം മൊറയൂര്‍ പൂക്കോട്ടൂര്‍ എന്നിവിടങ്ങളിലേക്കുണ്ട്

ഗോപാലസ്വാമി ബെട്ടയും ഗുണ്ടല്‍പ്പേട്ടിലെ സൂര്യകാന്തിപ്പൂക്കളും

ഹിമവദ് ഗോപാലസ്വാമി ബെട്ട, കേരളത്തോട് ചേര്‍ന്നു കിടക്കുന്ന ബന്ദിപ്പൂര്‍ വനത്തിലെ എറ്റവും ഉയരം കൂടിയ മല, ബെട്ട എന്ന കന്നഡ വക്കിന്റെ അര്‍ഥം തന്നെ മല എന്നാണ്. ക്രിസ്ത്വബ്ദം 1315 കാലഘട്ടത്തില്‍ ചോളരാജാവായിരുന്ന ബെല്ലാല(?) നിര്‍മ്മിച്ച ഒരു ശ്രീകൃഷ്ണ ക്ഷേത്രവുമുണ്ടിവിടെ.

ഗോപാലസ്വാമി ക്ഷേത്രം

അരിമ്പ്രമലകയറിയതിന്റെ ആവേശം തണുപ്പിച്ചുകോണ്ടിരിക്കുമ്പോഴാണ് ഗുണ്ടല്‍പ്പേട്ടിലെ സൂര്യകാന്തിപ്പൂക്കള്‍ വിരുന്നുകാരായി വന്നത്, സൂര്യകാന്തികള്‍ ഉണങ്ങുന്നതിന് മുന്‍പവിടെയൊന്നു പോകണം എന്ന ചിന്തക്ക് മുന്‍‌തൂക്കം ലഭിച്ചു കൊണ്ടിരുന്നു. കോഴിക്കോട് ചെന്നു ബസ്സില്‍ കയാറാം എന്നായിരുന്നു എന്റെ മനസ്സില്‍ പക്ഷെ കൂടയുള്ളവര്‍ക്കു ബസ്സ് അലര്‍ജിയാണ്. സുരയുടേയും പ്രശന്തിന്റെയും കൂടിയുള്ള കൂലങ്കഷമായ ചര്‍ച്ചകള്‍ക്കൊടുവില്‍ ഞാനും പ്രശാന്തും കാറില്‍ തന്നെ പോകാം എന്നു തീ‍രുമാനിച്ചു.

ഗൂഡല്ലൂരിലൂടെ

ഗോപാലസ്വാമി ക്ഷേത്രകവാടം

സമയം രാത്രി ഏകദേശം പത്തുമണിയായി, അത്താഴവും കഴിഞ്ഞു യാത്ര തുട്റ്റങ്ങി വൈകുന്നേരം വരെയുള്ള പരിപാടികളുടെ തളര്‍ച്ചയുണ്ടെങ്കിലും യാത്രയുടെ ത്രില്‍ ഞങ്ങളെ ഉത്സാഹഭരിതരാക്കി. അങ്ങനെ മഞ്ചേരി നിലമ്പൂര്‍ വഴിക്കടവ് വഴി നാടുകാണിച്ചുരം കയറാനായി എസ്‌എക്സ്‌4 മുരണ്ടു. മഞ്ചേരിയില്‍ നിന്ന് പെട്രോളുമടിച്ച് നിലമ്പൂര്‍ വഴി വഴിക്കടവിലെത്തി, നാടുകാണിച്ചുരത്തിന്റെ തുടക്കം. നാടുകാണിച്ചുരം, എന്നും സിരകളെ ത്രസിപ്പിച്ചിരുന്ന യാത്ര വന്‍മരങ്ങള്‍ നിറഞ്ഞു നില്‍ക്കുന്ന വനത്തിലൂടെ അധികം വാഹങ്ങളില്ലാത്ത വഴി.

ഒരു കാലത്ത് ബൈക്കില്‍ തനിയെ ചീ‍വീടുകളുടെ ശബ്ദം മാത്രമുള്ള കോട മൂടുന്ന ചുരം കയറി നാടുകാണിയില്‍ ചെന്ന് തിരിച്ചു വരിക എന്നതൊരു ഭ്രാന്തമായ വിനോദമായിരുന്നു. വഴിക്കടവില്‍ നിന്ന് ചായയും കുടിച്ച് ചുരം കയറി നാടുകാണിയിലെത്തുമ്പോള്‍ ഏകദേശം പന്ത്രണ്ട് മണി. ഗൂഡല്ലൂരില്‍ മുറിയെടുത്ത് താമസിക്കാം എന്നുള്ള വിചാരത്തിന് തല്‍ക്കാലം അവധികൊടുത്ത് മുന്നോട്ട് തന്നെ.

രാത്രി ഒരു മണിയോടെ ഗൂഡല്ലൂരില്‍ നിന്നും പതിനേഴ് കിലോമീറ്ററകലയുള്ള തൊപ്പക്കാടെത്തുമ്പോഴേക്കും ഉറക്കം കീഴ്പ്പെടുത്താന്‍ തുടങ്ങിയിരുന്നു, അവിടെ ബസ്സുകളുടെ സ്ഥിരം താവളമായ ചായക്കടയിലെ ലോഡ്ജില്‍ അന്നു രാത്രി തങ്ങി.

രാവിലെ നാലരയായപ്പൊള്‍ മൊബൈലിലെ അലാം അടിക്കുന്നതിനും മുന്‍പ് കോഴിയുടെ സൈറണ്‍ കേട്ടുണര്‍ന്നു. ഒരു കട്ടന്‍ ചായയും കുടിച്ച് തണുത്തവെള്ളത്തിലൊരു കുളിയും കഴിഞ്ഞ് വാഹനത്തിലേക്ക്. എകദേശം അഞ്ചരയായി നേരം വെളുക്കാന്‍ തുടങ്ങുന്നു. കൊച്ചു വെളുപ്പാന്‍ കാലത്ത് ഞങ്ങളെ ചെക്പോസ്റ്റില്‍ കണ്ട പോലീസുകാരന്‍ വല്ലതും തടയാന്‍ കൈനീട്ടി. തമിഴന്റെ മലയാളത്തില്‍ - ഒരു നയന്റി അടിക്കാന്‍ ഫ്രണ്ട്ഷിപ്പിന്റെ പേരില്‍ - അയാള്‍ ചിലമ്പിക്കൊണ്ടിരുന്നു, മുപ്പത് രൂപകൊടുത്തൊതോഴിവാക്കി.

ബന്ദിപ്പൂരിലെ പ്രഭാ‍തം

നേരം വെളുത്തുവരുന്നു കര്‍ണാടക അതിര്‍ത്തി കഴിഞ്ഞു കുറച്ചു മുന്നോട്ടു പോയപ്പൊള്‍ കണ്ട വെളിമ്പ്രദേശത്തു നിന്ന് കുറച്ച് ഫോട്ടോയുമെടുത്തു.

ഗുണ്ടല്‍പ്പേട്ടിലേക്ക്

ഊട്ടി മൈസൂര്‍ റോഡില്‍ ഗുണ്ടല്‍പ്പേട്ട് എത്തുന്നതിന് പത്തുകിലോമീറ്റര്‍ മുന്‍പാണ്, ഹിമവദ് ഗോപാലസ്വാമി ക്ഷേത്രത്തിലേക്കുള്ള വഴി തിരിയുന്നത്. വ്യക്തമായ ബോര്‍ഡുകള്‍ ഉണ്ടായിരുന്നതിനാല്‍ കണ്ടുപിടിക്കാന്‍ ബുദ്ധിമുട്ടുണ്ടായില്ല, മാത്രമല്ല വഴിതുടങ്ങുന്നിടത്ത് ഒരു കമാനവുമുണ്ട്. ഗോപാലസ്വാമി ബെട്ടയുടെ മുകളിലെത്താന്‍ ഇവിടെ നിന്ന് ഏകദേശം പതിനാറുകിലോമീറ്റര്‍.

സൂര്യകാന്തിപ്പൂക്കൾ പൂത്തുനിൽക്കുന്ന പാടങ്ങളുടെ ഓരത്തുകൂടിയുള്ള യാത്ര ഒരു നവ്യാനുഭവമായിരുന്നു. ഏകദേശം പത്ത് കിലോമീറ്ററോളം നിരപ്പായികിടക്കുന്ന പ്രദേശത്തുകൂടിയുള്ള യാത്രകഴിഞ്ഞ് മലമുകളിലേക്കുള്ള പാത തുടങ്ങുന്നു, ഇവിടെ കർണാടക വനം വകുപ്പിന്റെ ഒരു ചെക്പോസ്റ്റ് ഉണ്ട്.

ഗോപാലസ്വാമി ബെട്ടയിൽ വീഡിയോഗ്രാഫിയും അനധികൃത ട്രക്കിംഗും നിരോധിച്ചിട്ടുണ്ട്, കാറിന് അൻപതു രൂപ പ്രവേശനഫീസായി നൽകണം.

മലമുകളിലേക്കുള്ള യാത്ര രസകരമാണ്, താഴെ മഞ്ഞ നിറത്തിൽ സൂര്യകാന്തിപ്പൂക്കളുടെ പാടങ്ങളും മുകളിൽ നീല അകാശത്തെ മുട്ടുരുമ്മുന്ന കോടമൂടിയ മലകളും. പുൽതകിടുകളും വന്മരങ്ങളും നിറഞ്ഞയീമലകൾ നാനാജാതി പക്ഷികളുടെയും പലതരം മൃഗങ്ങളുടെയും വാസസ്ഥലമാണ്.

സമയം ഏകദേശം രാവിലെ എട്ടുമണിയായപ്പോൾ ഞങ്ങൾ മലമുകളിൽ എത്തി, തണുപ്പുള്ള കോടമഞ്ഞുള്ള വളരെ മനോഹരമായ സ്ഥലം. പഴയ രീതിയിൽ കൊത്തുപണികളുള്ള അധികം വലുതല്ലെങ്കിലും മനോഹരമായ അമ്പലം. അമ്പലമുറ്റത്തുനിന്നാൽ പടിഞ്ഞാറ് ഭാഗത്ത് അടുത്ത് ബന്ദിപ്പൂർ വനത്തിലെ പുൽമേടുകൾ കുറച്ചകലെ വയനാടൻ മലകളും. കിഴക്കുഭാഗത്ത് ചാമരാജ് നഗർ ജില്ലയുടെ സമതലപ്രദേശങ്ങളും. കാവൽനിന്ന വനപാലകൻ ഞങ്ങളെ കുറച്ചുദൂരം പുൽതകിടിയിലൂടെ നടക്കാൻ അനുവദിച്ചു.

സമയമുണ്ടെങ്കിൽ ഒരു ട്രെക്കിംഗിന് സഹായിക്കാനുള്ള സന്നദ്ധത അയാൾ പ്രകടിപ്പിച്ചുവെങ്കിലും, പ്രശാന്തിനതിലൊട്ടും താല്പര്യമില്ലാ‍ത്തതിനാൽ (പേടികൊണ്ട് :-) ) അതു വേണ്ട എന്നു വെച്ചു. കുറച്ചു നേരം അവിടെ തന്നെ ചിലവഴിച്ച് ഞങ്ങൾ പതുക്കെ തിരിച്ചു വന്ന്, സൂര്യകാന്തിപ്പാടങ്ങളുടെ ഇടയിലൂടെ ഗുണ്ടൽ‌പ്പേട്ട് സുൽത്താൻ ബത്തേരിറോഡിൽ വന്നു ചേർന്ന്, സുൽത്താൻ ബത്തേരി വഴി വീട്ടിലേക്ക് പോ‍ന്നു.

വിവരങ്ങൾ

ഗുണ്ടൽ‌പേട്ട് - കർണ്ണാടകയിൽ ചാമരാജനഗർ ജില്ലയിൽ ഉൾപ്പെടുന്ന ഇവിടം മൈസൂരിൽ നിന്ന് ഊട്ടി റോഡിൽ അറുപതു കിലോമീറ്ററോളം ദൂരെയാണ് അല്ലെങ്കിൽ സുൽത്തൻബത്തേരിയിൽ നിന്ന് അൻപത്തിരണ്ട് കിലോമീറ്ററോ, നിലമ്പൂരിൽ നിന്ന് ഗൂഡല്ലൂർ വഴി ഏകദേശം എഴുപതു കിലോമീറ്ററോ യാത്ര ചെയ്താൽ ഇവിടെയെത്താം. പ്രധാനമായും കൃഷി, വിശാലമായ പാടശേഖരങ്ങളിൽ റാഗി, ജോവർ, ചോളം എന്നിവയും കൃഷി ചെയ്യുന്നു. ബന്ദിപ്പൂർ വനമേഘലയോട് ചേർന്ന് ധാരാളം റിസോർട്ടുകൾ ഊണ്ട്. തമിഴ്‌നാട്ടിലെ തൊപ്പക്കാട്, ഗുണ്ടൽ‌പ്പേട്ട് നിന്ന് ഊട്ടി റോഡിൽ ഏകദേശം മുപ്പത് കിലോമീറ്റർ.

ഗോപാലസ്വാമി ബെട്ട - സമുദ്രനിരപ്പിൽ നിന്ന് 1454 മീറ്റർ ഉയരത്തിൽ സ്ഥിതി ചെയ്യുന്നു ഇവിടെ ചോളരാജാക്കന്മാർ അവരുടെ പ്രതാപകാലത്ത് നിർമ്മിച്ച ശ്രീകൃഷ്ണക്ഷേത്രമുണ്ട്. പിന്നീട് വന്ന മൈസൂർ രാജ്യത്തിലെ വിഷ്ണു ഭക്തരായ വൊഡയാർ രാജകുടുംബം ഈ ക്ഷേത്രത്തെ സംരക്ഷിച്ചു നിർത്തി. ഇപ്പോൾ ഇവിടം ബന്ദിപ്പൂർ വനമേഘലയുടെ ഭാഗമാണ്. മലമുകളിൽ വനം വകുപ്പിന്റെ ഒരു ഗസ്റ്റ് ഹൌസ് ഉണ്ട്, ട്രെക്കിംഗിനും വീഡിയോ എടുക്കാനും വനം വകുപ്പിന്റെ മുൻ‌കൂട്ടിയുള്ള അനുവാദം വേണം.

എന്റെ യാത്രകളിലേക്ക് സ്വാഗതം

ലക്ഷ്യമില്ലാത്ത യാത്രകളിലൂടെ